اغنية تذاكر يا هانم تذاكر يا بيه كلمات مسارح وسيما عمدان النور
مسارح .. وسيما .. وسيرك وأفيش
وصورة المنيّل .. وكاب الشاويش
وكلب الحراسة .. وكرسى الرياسة
وحبة سياسة .. وطربة حشيش
تذاكر يا هانم .. تذاكر يا بيه
هاتدخل بعيل .. تحاسب عليه
جميع اللى ماتوا .. عيالى الصغار
جميع اللى عاشوا .. ملوك القمار
تدخن يا باشا سجاير بلاش
وتنسى اللي ميت وتنسى اللي عاش
وتقلع هدومك وتلبس همومك
وتاكل سمومك بكل انتعاش
تكية بهية وكشك السعادة
و لمك يا حلوة يا سكر زيادة
وصرخة بناتك وشرخة بياتك
شهادة وفاتك في حالة عبادة
عَزيزي المواطن عَزيزي الفَقير
أمالَك في بُكرة بتنقَص كتير
بِتنقَص بلاَدك أراضي وبيوت
وتنقَص ولادك تَبوت فوق تَبوت
حَياتك يا فندي حياة متساويش
ف إيه اللي يجبر جَنابك تعيش؟
دا بينك يا باشا وبين الحياة
حواجز وشيش خلف شيش خلف شيش
ستالو العجايب عجيب العجاب
تموت البراءة وتحيا الكلاب
وتصنع مهازل وتهدم منازل
وتعمل عوازل ما بين الصحاب
أتاري اللي ميت قتيل الغرام
واتاري البلد دي بتهوي الكلام
وتهوى البنادق وتهوى الخنادق
وتهوى اللي صادق في صورة عضام
تعليقات
إرسال تعليق