الاجابة هى :
اول حاجة لازم نعرفها ان التجارة الناجحة مش بتعتمد بالدرجة الاولى على الفلوس
تاني حاجة ان اى حد بدا اى مشروع و نجح مكنش عنده خبرة في الاول .
طيب ابدأ منين و اعمل ايه ؟
- النصيحة الاولى : انوي اني هشتغل و اتوكل على الله
- النصيحة التانية : ابدأ اجمع مش اقل من 20 تاجر او صفحة او مكتب اكون شايف ان شغلهم مناسب معايا و تعليقات الناس على صفحاتهم مفيهاش شكاوي كتير ( ملحوظة وجود شكاوي مش مشكلة , اهم حاجة طريقة التعامل مع الشكوى و انها متكونش متكررة من ناس كتير و متكونش في امانة التاجر )ممكن ابعتلهم كلهم رسالة مفادها اني جديد في المجال و محتاج ابدأ بس معنديش خبرة او رأس مال بس عندي استعداد اني اسوق منتجاته، و ممكن اسأله :
- لو مناسب معاه اني اجمع اوردرات و بعد كدة اخدها
- لو ينفع اخد مقاسات معينة او الوان معينة حسب اللي يتطلب مني
- ممكن تسأله لو اخدت حاجة و اتبقى منها جزء ينفع ترجعها ولا لا
- لو عنده بواقي موديلات مثلا قطعة او قطعتين باقيين من موديلات خلصت من عنده و انك ممكن تاخد القطعة او القطعتين دول من كل موديل تبدأ بيهم
- لو عنده عينات من شغل قديم متخزنة ممكن تبدأ بيهم برضه
- تلطف في الحديث مع الناس لانك متعرفش هو ظروفه ايه
- النصيحة التالتة : ممكن تجمع كذا حد من اللي لسة بادئين و تتفقوا انكوا تشتروا كميات من التجار و المكاتب مع بعض و تقسموها بحيث كلكوا تاخدوا سعر كويس و في نفس الوقت كل واحد فيكوا ميبقاش اشترى كمية كبيرة لوحده
- النصيحة الرابعة : اعرف ازاى هتوصل الحاجة سواء بنفسك او عن طريق حد او عن طريق شركة توصيل او شحن( و اعمل حسابك ان في شركات بتاخد على الشحن و على رجوع الفلوس )
- النصيحة الخامسة : لما تيجي تسوق حاجة اعرف خامتها علشان اكيد الناس هيسألوك، و اعرف بتلبس سن كام و وزن كام كيلو علشان دي اسئلة اساسية
- النصيحة السادسة : ممكن تبدأ تسوق في نطاق مكانك الاول و تركز على الناس اللي في مدينتك علشان لو شحنت حاجة بعيد و العميل مستلمهاش متدفعش فيها شحن رايح جاى
- النصيحة السابعة : في الاول لو ناوي تبيع جملة فيا ريت تركز في الجملة ولو ناوي تبيع قطاعي ركز في البيع القطاعي لحد ما تتمكن و تعرف و بعد كدة ممكن تبقى تبيع الاتنين
- النصيحة الثامنة : بالنسبة للربح أهم من الربح هو انك تكسب مصداقية العملاء و تخليهم يثقوا فيك لان لو وثق فيك هيشتري منك و هو مغمض و هيقول للناس عليك و هيخليهم يشتروا منك، يعني هيعملك تسويق وهتلاقي بضاعتك بتتباع من غير تعب ، و طبعا لو مفيش مصداقية او ثقة هيحصل العكس.
- النصيحة التاسعة: تلطف مع العملاء و مع الموردين بتوعك و خلي كلمتك واحدة معاهم في اتفقاتك و لو حسيت انك مش هتقدر تعمل حاجة اتفقت عليهم قولهم و بلاش تهرب من حد او متردش على حد بسبب انك مش هتقدر تنفذ حاجة اتفقت عليها، عادي كلنا ممكن نتفق على حاجات و ممكن منعرفش ننفذها بس المهم اني مفقدش احترامي مع الناس
- النصيحة العاشرة : افصل بين ميولك الدينية و السياسية و الرياضية بين شغلك، على صفحتك الشخصية براحتك انما على صفحة او جروب شغلك مش من مصلحة الشغل انك تدخل فيها ميولك الدينية و السياسية و الرياضية
- النصيحة الحادي عشر : اهم سؤال تسأله لنفسك كل يوم ازاى الناس تشتري مني انا بالذات؟ الاجابة هتطلعلك حاجات تميز عن غيرك
- النصيحة الثانية عشر : لو اختلفت مع حد سواء مورد او تاجر بلاش تقلب القصة لدعاء عليه و حسبي الله و نعم الوكيل و تشريد بينكوا و تصوير لمحادثتكم و الكلام ده لانه مضر اكتر منه بينفع و بيدي صورة ذهنية عنك انك بتاع حوارات مش بتاع شغل و بتخلي الناس تتفرج عليك، اشغل نفسك بالعمل و سيب الجدل
تعليقات
إرسال تعليق