حل لغز حجز الفندق والدينار المفقود

حل لغز حجز الفندق والدينار المفقود

ثلاثه راحوا يحجزون الفندق والليلة بـ30 د.ك، كل واحد دفع 10 (3 × 10 = 30). انتبه مدير الفندق ان المفروض كان يعطيهم خصم ويصير الحجز بـ 25 دينار، خذا 5 وعطاها الجرسون قاله اذلف روح عطهم الباجي. راح الحبيب وقال عباله إذا أقسّم 5 دنانير على ثلاثة، خل اعطي كل واحد دينار واحط دينارين بجيبي …

وصج راح ورد دينار حق كل زبون من الثلاثة وحط الدينارين حقه، بدون ما يدرون الزباين ان المفروض يرد لهم ما مجموعه 5 دنانير مو بس 3.

قيمة الفندق الفعلية هي 25 دينار

بعد إرجاع الدينار لكل زبون يطلع كل واحد منهم دافع 9 دنانير مو 10

فإذا جمعنا فلوسهم الحين راح نكتشف انهم دافعين ما مجموعه

9 × 3 = 27

والدينارين اللي باقهم الجرسون الشيطون

27 + 2 … يطلع 29 دينار

وين راح الدينار الأخير؟!

الاجابة هى :

طريقة أولى:

نحسب من الأخير لي البداية

30 دينار دفعها الزبائن

الموظف خذا دينارين ( 30-2 = 28 )

كل واحد رد له دينار ( 28 – 3 = 25 )

اللي هو المبلغ اللي عند المدير

ماكو دينار ضايع ^_^

طريقة ثانية:

فرضاً المدير طلع غلطان و ماكو خصم و انتبه بعد ما سلمهم الفلوس

راح ايي الزبائن و يعطون المدير 3 دنانير

و ايي الموظف يبي يغطي على روحه انه ما باق و يرد الدينارين

المجموع لي هني 5 دنانير

و المدير عنده 25

صاروا 30

ماكو دينار ضايع ^_^

….

زين شلون الحسبة مكتوبة بطريقة مخادعة؟ لي الحين مو قادر اقتنع!

يوم قلنا مجموع اللي دفعوه الثلاثة بعد إرجاع الدينار صار 9 × 3 = 27

اللغز قال ضيف عليهم الدينارين اللي باقهم الجرسون.

الخدعة هني، المفروض هالدينارين ما ينضافون، لأنهم داشين ضمن الـ27 بالأساس

مثل ما شفتوا فوق بالطريقتين واضح الحل ما فيه دينار ضايع أبد، مجرد تلاعب بترتيب الأرقام