الشورت بلوك عباره عن ايه
الاجابة هى :
مصطلح «الشورت بلوك» هو تسمية لمحرك السيارة
لما تسمع حد بيقول إن المكنة دي "شورت بلوك" معني الكلمة دي هي النص السفلي للمكنة ودي بتبقي عبارة عن مكنة متقفلة عادى جداّ زي أي مكنة بس من غير وش سلندر
بالإضافة كمان إن بيكون متشال منها الحاجات بتاعتها اللى من برة اللي هي أدوات التغذية بتاعتها زي ( المارش و الدينامو و طلمبة الباور و الكاربيراتير ) و طبعاّ الفتيس مش بيبقي موجود .. إلخ ..
يعنى من الأخر المكنة مش بتتباع بساتم لوحدها أو وش سلندر لوحده أو كرنك لوحده لأ المكنة بتكون حتة واحدة على بعضها ومتقفلة وطبعاّ هتحتاج إنك تروح للمرور لو غيرت الشورت بلوك لأن رقم المكنة بيكون مختوم على البلوك وطبعاّ بتبقي مشكلة مع الفحص لو أكتشفوا حاجة زي دي
طـب اية السبب اللى يـخلينى أشترى شورت بـلوك
1 – انك تـيجى تـعمل عمرة تـلاقى التـكلفة بتاعت العمرة اعلى و اغلى من تمن الشورت و انك متاكد ان وش السلندر عـندك تـمام
2 – انك مش عاوز تشترى موتور كامل فـ بتشترى شورت
لو لاقدر الله احتجت تجيب شورت بلوك جديد او هتغير عموما لاى سبب من الاسباب
حط فى اعتبارك ان الشورت بلوك دة بيبقى له ورق بيجى معها بيبقى عبارة عن افراج جمركى من التاجر والشورت بيبقى عليه الرقم الموجود فى الرخصه واسمه رقم الموتور وفى ناس بتجيب الشورت دا من غير ورق وبيبقى سعره قليل وتقوم تاخد الحشو بتاعه وتركبه فى موتور العربية المثبوت فى الرخصة ودايما مصنعية نص الشورت بتبقى اعلى من تركيب شورت موتور لان الميكانيكى بيبنى الموتور من تانى ويقسمه والاحسن انك تجيب موتور بالوش بتاعه من غير الملحقات لانك لو هتجيب نص شورت ممكن يكون عندك وش السلندر تعبان فالاحسن انك تجيب موتور كامل فاضى
3 -تكلفة تركيب الشورت او النص شورت بتبقى اقل من تكلفة العمرة
الـناس بـقى اللى بتجيب نص الشورت و بتركبة علطول و لو فى مشكلة ترجع تكتشف بعدين بعد ما تكون دورت الموتور ان نص الـشورت بلوك مستخدم قـبل كدة و مستعمل و طالع عـينه بس متلمع و متنضف و طبـعا الكلام دة للـناس اللى بـتشترى أستيراد فا الـحل بتاع الكلام دا لما بنجيب نص شورت ( بلوك بالبساتم) وشكله مش عاجبنا وقلقانين منه بنـفك البـساتم نطمن و نكشف عليها لو تمـام الشورت بيركب عادى غير كدة الشورت بيتغير
وهغششكوا شوية حاجات كده وشوية حتت صياعه مبتجيش غير من وهبه هتعجبكوا
عشان تشترى شورت ويطلع سليم من اول مرة
وانت رايح تشترى خد الميكانيكى بتاعك معاك يبص عليه
يفضل لو الشورت اللى هتجيبه فى حساسات يبقى تكون معظمها سليم عشان تعرف تحتفظ بطقم حساسات ببلاش تشيله عندك كانه قطع غيار
ويا سلام بقى لو الشورت جاى وراكب على الحساسات بتاعته فيش مقطوعه هتبقى كده معاك شوية فيش حلوين تشيلهم للزمن بدل ماتبوظ فيشة معفنة متسواش ٢ جنيه وتروح لكهربائى يحسبهالك ب٥٠ جنية
لما تروح تجيب الشورت حاول على قد ما تقدر يكون الوشوش الفبر بتاعة الكاتينة والموتور سلام
لو لاقيت الكارتيرا بتاعت الزيت مخبطه ومتنيه اعرف ان التاجر دا مهمل وبيرزع المواتير فى الارض
بص على الفرن او خرج الشكمان لو لاقيت تعريق زيت فى مكانه اخلع من الشورت دا لانه كده بيدخن
بلاش تنقى شورت يكون غرقان زيت لان دا معناه ان الموتور بينفخ وعايز شمبر
ارفع مقاس الزيت والقى نظرة كده على الزيت لو لاقيته فيه رايش معدنى اخلع من الشورت دا ولو حتى ببلاش
الحته اللى جاية دى بقا صياعه نمره واحد
بص على بوز كوع المياه الالومنيوم الحته اللى بيركب عليها الكوع الكاوتش لو لاقيته بيلمع اعرف ان الموتور دا حلو وجديد لو لاقيته يعنى نص مصدى دا طبيعى والموتور كويس ودا بسبب الاملاح اللى فى المياه
لاقيته متاكل ودايب اعرف ان الموتور مستهلك وصاحب العربية اللى كان فيها الموتور دا حريقة وكان مستهلك العربيه على الاخر
النصيحه دى انا بطبقها معرفش غيرى بيعملها ولا لا ؟!
بعد ما ربنا يكرمنا وندور الشورت ويبقى تمام بعديها بالف كيلو بنعمله طقم سيرفيس عشان نطول عمره
تعليقات
إرسال تعليق