ازاي اكلم البنت اللي معجب بيها

 ازاي اكلم البنت اللي معجب بيها

البنات دايمًا بيحبوا يحسوا إن إللى قدامهم عايز يكتشفهم، عايز يفهمها ومهتم إنه يعرفها ويعرف أدق تفاصيل فى حياتها، بجانب طبعًا إن معظم البنات بيعزوا الرغى زى عينيهم فكل ما تديها فرصة ترغى أكتر كل ما هيكون عندك فرصة معاها أحسن.

أول حاجة مناسبة تفتح بيها الحوار هو إنك تحاول تعرفها هى شخصيا، تكتشف شخصيتها، زى مثلاً لو هى مش معاك فى الشغل يبقى إسألها عن طبيعة شغلها مبسوطة فيه ولا لأ، كان نفسها تكون إيه وهى صغيرة، عايزة تحقق إيه قدام، إيه أكبر هدف فى حياتها… وهكذا

كمان من الأسئلة إللى بتخرجكوا من حالة التوتر أو التنشنة إللى ممكن تكونوا فيها هو السؤال دا بكل مشتملاته ، يعنى إيه أكتر لون بتحبه، أكلتها المفضلة، فيلمها المفضل، أكتر مكان بتحب تروحه.. بتحب القراءة ولا لأ، بتحب الخروجات ولا البيت أكتر، بتحب تعمل إيه وهى مبسوطة وهكذا.

طبعًا مش من الحاجات الحلوة خالص إنك تفضل قاعد صامت طول القاعدة، ومش هو دا إللى قصدناه لكن دخولك فى الكلام لازم يكون بتكنيك وفن معين علشان لا يبان إنك رغاي ومدلوق ولا يبان إنك ساكت على طول ومش مهتم. 

أول ما تلاقي حاجة مشتركة بينكم إمسك فيها لأن دى هتفتحلك طاقة القدر فى الكلام، يعنى مثلًا لو مجال شغلكوا واحد إبدأ اتكلم عن مواقف ليك فى الشغل دا، بس مواقف بجد يعنى لو حكيتها هتنبهر بيك أو موقف كان مشكلة مثلًا وأنت وصلت لحل أو حتى ممكن موقف كوميدى ولطيف كده “بس لطيف بجد هاااه!!” ساعتها هتلاقى حابه تسمعك ومستجيبة معاك كمان

فى أسئلة كده بتكون عادية جدا بس البنات بتحب تتسألهم “طبعا بشياكة” زى مثلًا مين أقرب حد ليكى، علاقتك بإخواتك، أنتى أقرب لمين أكتر “مامتك ولا بابكى” إيه أكتر حاجة مجنونة عملتيها، أكتر حاجة بتخوفك، أكتر شخصية بتحبيها فى الناس، مواقف صعبة فى حياتك، حاجة ندمتى عليها. نوع الأسئلة إللى زى دى بيكون مهم جدًا بالنسبالك لأنك مهم تركز فى كل إجابة بتقولها ومنها هتعرف حاجات كتير عنها، ومش قصدى هنا الحاجات إللى هى بتقولها .. لأ، قصدى الكلام إللى بين السطور، الكلام إللى بتقوله وإللى هتفهم منه حاجات هى مش هتقولها، فخليك مصحصح.