ما يقال للعروس :
اويها ياما قعدوا جنبي
اويها ياما حرقوا قلبي
اويها و قالوا فلانة ما بتتجوز
اويها تجوزت و نصرني ربي
اويها يا صحن مجدرة
اويها مجلل بالكزبرة
اويها و عروستنا حلوة
اويها ما بدها غندرة
اويها يا صحن نجاص
اويها مجلل بالالماس
اويها عرستنا بنت اصل
اويها و بينرفع فيها الراس
اويها يا صحن تين
اويها مجلل بالياسمين
اويها عروستنا حلوة
اويها و ما طبقت العشرين
اويها قبقابك راديو
اويها وسيرو بيغني
اويها و عريسك زغير
اويها ريتك تتهني
اويها سبع بقج بقجتلك
اويها و الثامنة بالصندوق
اويها الك الحمد يا ربي
اويها ما حجتنا لمخلوق
اويها ابو العريس\العروس عالسجادة
اويها بالصلاة و العبادة
اويها طول عمرو بيدعي لولادو
اويها ربي يواتيهون بالسعادة
اويها عنا حبة درة
اويها لا بتنباع و لا بتنشرا
اويها و عريسنا فلان
اويها نقى احلى جوهرة
اويها خدودك طرايا
اويها زنودك مرايا
اويها تسلم عيون فلان
اويها نقاكي من بين الصبايا
اويها عروس عروس كم مية قبض عمك
اويها يا مبيضة شاش ابوكي مع شاش امك
اويها قرص العسل لنتسل (يعني سال العسل منو) جاري على تمك
اويها يا عود ريحان لسة ما حدا شمك
اويها عروس عروس يا بيضة و يا غية (مطلوبة من الكل )
اويها يا بنت الشيخ و كنة الافندية
اويها اجوكي سبع بدلات من الأمارات مطوية
اويها طقم الأكابر و ملبوس الأفندية
اويها عروس عروس يا بيضا و يا غضة
اويها يا سمكة بحر تلعب بزرد فضة
اويها قدمت حالي و مالي لبيك تايرضى
اويها قوموا اصلحوا بينانا ما عاشت البغضا
اويها الدهب بقفاصو
اويها و اللولو بجراسو
اويها و يللي اخد من بيت فلان
اويها بيمشي و بيرفع راسو
اويها قامت النخلة تميل
اويها على حواض الياسمين
اويها يا نخلة مين كساكي
اويها فلان عمرو طويل
اويها قالو عنك طويلة قلت بيرق العسكر
اويها قالو عنك قصيرة قلت شمعة بالمحضر
اويها قالو عنك زغيرة قلت العسل بكّر
اويها قالو عنك بيضا قلت الياسمين زهّر
اويها ارقصي و لا تبالي
اويها ياما وراكي من رجالي
اويها وراكي ابوكي و اخوالك \اعمامك
اويها يهدوا الجبل و لو كان عالي
اويها يا ام التراكي ( الحلق)
اويها و اعرفي مين وراكي
اويها وراكي فلان
اويها حل كيسو و اشتراكي
اويها ارقصي يا قمر ما نقص
اويها عريسك عقيد الخيل بضهر الفرس
اويها لما سمع برقصتك
اويها فتح عيونوا و طار النعس
اويها حطي المخدة وراكي
اويها عريسك عم يستناكي
اويها دير بالك على حماتك
اويها و نيالك على بنات حماكي
اويها فلانة بدي انصحك نصيحة
اويها خليكي منيحة
اويها و اسمعي كلمة حماتك
اويها بتعيشي عيشة مريحة
اويها ببيتنا في بحرة
اويها جواتا سمكة
اويها عروستنا حلوة
اويها احلى من الملكة
اويها العين عنك تجنبي
اويها الف الصلاة على النبي
اويها و اللي ما تفرح معنا
اويها ما تشوف بديارها لا بنت و لا صبي
اويها عروستنا تريا
اويها و مداعيها نجوم
اويها طفوا الكهربا
اويها ما عاد الها لزوم
اويها قامت العروس على حيلها
اويها و هرهر الياسمين من ديلها
اويها لا تقولوا عروستنا وحيدة
اويها في كذا (عدد اخواتها) غيرها
اويها انا بنت حماكي الفالحة
اويها انا اللي خطبتك مبارحة
اويها اليوم لبستك البدلة
اويها و العطور منها فايحة
اويها ما احلى الخاتم بايدك
اويها يسلم اللي لبسك ياه
اويها الله يعطيكي و يزيدك
اويها و تتهني انتي وياه
اويها لبسك العريس اساور على قد ايديكي
اويها يا عرق الماس من بين عينيكي
اويها لما يجوا العدويين يتغامزوا عليكي
اويها انتي بنت الاكابر ما بيتشبهوا ليكي
اويها حصنتك بياسين
اويها يا زهر البساتين
اويها يا مصحف صغير مطوي
اويها يا عروس السلاطين
اويها نحنا السمر(السمراوات) نحنا خوختين بعود
اويها اللي بيهوانا ما بيجيه قعود
اويها وحياة موسى و عيسى و النبي هود
اويها السمر حلوين و لو كانوا عبيد سود
اويها عروس قيمي هالغطا و ارميه
اويها يسعد يللي حبوكي و يللي سعا فيه
اويها هالوجه دورة قمر و العين تغزل فيه
اويها و الخصر شلة حرير و العريس سايح فيه
اويها طلعت لعندك لآخد دوا للعين
اويها نزلت من عندك اعمى من التنتين
اويها لا انا قتيل واحد و لا انا قتيل تنين
اويها انا قتيل الحواجب فوق هدب العين
اويها يا عروس بيضا عم تقطف حب الرمانِ
اويها و المسك بجيباتها عم يفوح ريحانِ
اويها قلتلك يا عريس عروستك ما الها تاني
اويها انت الثريا و هي الكوكب التاني
اويها يا عروس ارفعي راسك
اويها لا تستقللي بناسك
اويها الورد حمرة خدودك
اويها و الياسمين فراشك
اويها عصفور عالدالية و البلبل عم يترغلّو
اويها ييلي بياخد من الاكابر الله يسهلّو
اويها لروح لابو العريس ووقف و قللو
اويها عروستنا بتسوى عسكرك كلّو
اويها جبتلك الطرحة طية على طية
اويها طية من الشام و طية شغل ايديي
اويها طلي من الشباك و قولي خاطرك يا خيي
اويها و انا غريبة ابقوا طللوا عليي
اويها يا عرق الماس
اويها و مشكول بالراس
اويها و عروستنا حلوة
اويها صلوا عالنبي يا ناس
ما يقال للعريس :
اويها ببيتنا في رمانة
اويها حامضة و لفانة
اويها حلفنا ما نقطفها
اويها ليتجوز فلان بالسلامة
اوها طبخنا مجدرة
اويها طلعت مدردرة
اويها و يللي ما بيحب العريس
اويها يلزق بسفل الطنجرة
اويها عريسنا يا ناس شو بتقولوا فيه
اويها عريسنا دهب غالي جنس الزغل ما فيه
اويها و اللي راح لبيت حماه و حكى عليه
اويها يبلاه بشنقو و تاني يوم بعزّي فيه
اويها عريسنا اسمر و عيّاري (ما حدا بيتشبهلو)
اويها ما يلبس الجوخ الا بزراري
اويها ما يدق الباب الا بخنصرو
اويها ريت عدوو بسماري
اويها عريس عريس يا لولو على فنجان
اويها يا عرق الماس جبتك من اراضي الشام
اويها يا زين تقلك دهب يا زين تقلك مال
اويها و بطالعك يا قمر تضوّي على البلدان
اويها عريس عريس يا لولو على راسي
اويها سيفك مسقّط و دبوسك دهب صافي
اويها و ان عطشت الخيل لاوردها على العاصي
اويها و احشي قلوب العدا بارود و رصاصي
اويها طولك طول العلم
اويها شواربك خط القلم
اويها كأنك شريف مكة
اويها تتفتل بارض الحرم
اويها عريس عريس لما اجى الحلاق يحلقلك
اويها حط المناشف على كتفك تلبقلك
اويها امك تهللك و اختك تزلغطلك
اويها و خالتك تقللك يا قمر ما خلق متلك
اويها عريس عريس تقّل خاتمك بإيدك
اويها الكرم كرمك و اللولو عناقيدك
اويها سألت رب السما يعطيك و يزيدك
اويها انت المعلم و الصنّاع تحت ايدك
اويها يا خوخ بغبارو
اويها يا ورد بزرارو
اويها يللي ما يحبك يا عريس
اويها انشالله ما بتعمر ديارو
اويها يا عريس لا تعبس
اويها افرد البقجة و البس
اويها شواربك عروء الريحان
اويها و سوالفك عروء النرجس
ما يقال لاهل العريس و اهل العروس و المعازيم :
اويها فلان يا واحد
اويها فلانة يا تنين
اويها و خرزة زرقا
اويها ترد عنكون العين
اويها طبخنا محشي
اويها و الرز بيمشي
اويها و نحنا بيت فلان
اويها بيلبقلنا كل شي
اويها عريسنا من حارة
اويها و عروسنا من حارة
اويها عرسنا قمر
اويها و عروسنا جلنارة
اويها طبخنا بطاطا
اويها طلعت كماية ( حبة كمه)
اويها نيالك يا عروس \ عريس
اويها على هالحماية
اويها نحنا و نحنا و عاداتنا ركوب الخيل
اويها نلبس حرير بحرير و نرخي كمامنا للديل
اويها وين الشجيع ( الجريء) يدق بوابنا بالليل
اويها نسيّب حريمو و تبقى حالتو بالويل
اويها نحنا و نحنا و مين يقدر يخاصمنا
اويها نحنا لباسين الخواتم بخناصرنا
اويها سألت رب السما العالي ينصرنا
اويها نصرة عزيزة و ما يكسر بخاطرنا
اويها نحنا و نحنا من روس اللحا نحنا
اويها نحنا نسورا لو قصوا جوانحنا
اويها وحياة تربة نبي لزيارتو رحنا
اويها نحنا نكيد العدا وين ما رحنا
اويها تنيني تنيني عين الله على تنيني
اويها فلان على الساقية و فلانة على العينِ
اويها ندرا عليي ان فرحت بالتنين
اويها لدق طبل الفرح عامين و ليلي
اويها شو هاد
اويها و شو فنو
اويها و انشاالله يوم فلان
اويها منعمل احسن منو
اويها طلع دخانا
اويها على حيطاننا
اويها و يللي طعمنا
اويها يطعم جيراننا
اويها ديارنا كبيرة
اويها درج الحمام فيها
اويها ام العريس فرحانة
اويها الله يهنيها
اويها امشي دقا دقا
اويها يا فستق منقّى
اويها كل الفرحات بطّالة
اويها الا فرحتنا من حقا
اويها ام العريس \العروس الهي يعطيكي
اويها و السعادة تواتيكي
اويها و عقبال فرحتك بالباقيين
اويها و نجي نكافيكي
اويها ام العريس انا جوعانة
اويها بدي صفيحة مقمّرة
اويها انشالله بتضلي فرحانة
اويها و ديارك معمرة
اويها يا جماعة كلكون
اويها ما نسينا فضلكون
اويها اليوم الفرح عنا
اويها و انشالله بكرا عندكون
اويها يا صحن رز بحليب
اويها و كل ما برد بيطيب
اويها و نحنا كلنا اهلية
اويها و مافي حدا غريب
اويها يا صحن فتوش
اويها و الخيار فيه قروش
اويها و يللي ما بتفرح معنا
اويها انشالله بتشوف بمنامها ياسين بقوش
اويها و القطة قالت نو
اويها و الكلب قال عو
اويها و اللي ما بيفرح معنا
اويها انشالله ما بيطلع عليه الضو
اويها بناتنا مخباية
اويها و شبابنا مرباية
ويها وجهازنا عالموضة
اويها سجادة و مراية
اويها عالعلعي عالعلعي
اويها يا صبايا تجمعي
اويها يا ليل طول طول
اويها يا شمس لا تطلعي
اويها اصطفوا يا صبايا بسوية
اويها بدار ابو فلان هالفضيّة
اويها و اشربوا القهوة عوافي
اويها بفناجين العجمية
اويها صبوا القهوة بالكاسات
اويها و ديروا هالصينية
اويها اليوم عرس فلان
اويها عقبال العزابية
اويها البحر مرحرح
اويها و السمك بيسبح
اويها و على زمن ابو فلان
اويها منعيش و منفرح
تعليقات
إرسال تعليق