كلمات قصائد هشام الجخ
الرساله الاخيرة
- الوقت يمضي والحياة تُسارعُ
- فأظفر بعمرك إنه لا يرجعُ
- حاور وناقش واستمع
- صوت الجموع فقط
- جموع الصم من لا تسمع
- إني رأيت بمصر نهر محبة
- ما كان من دون الحوار سينبُعُ
- عانت بلادي ظلمة الصمت الثقيل
- فكل صوت كان يعلو يُقمع
- حتى أتاها صوت جيل يناير..
- فغدت تلملم حسنها وتُجمِّعُ
- كنا نكلم قادة الحكم القديم
- فما استجابوا للكلام وما وعوا
- ظنوا -على جهلٍ- بأن كلامنا
- خطرٌ يُهددُ عرشهم ويُزعزع
- اليوم تبكي كل نفس صنعها
- وتود لو عاد الزمان فتصنع
- يا من يحبون العروبه انصتوا وتحاوروا
- وتناقشوا و تشجعوا
- انتم الملوك فخمت درجاتكم وشعوبكم ايضا تصان وترفع
(اختلاف)
- يا حبيبي هذه البدايةُ تختلف
- هذا البريقُ الساكن الجفنين مابين البدايةِ و البدايةِ يختلف
- هذه الوجيعةُ حين يذكر اسمُها او حين يعلو في الدماء ندائها
- هذه السطورُ تألفت و تجمعت كلماتُها كي تستحيل قصيدة ً..
- هذه القصيدةُ تختلف
- و ادى اللى صار، من يومي مطلوق ... تحت فوق
- عايش حياتى بالإختيار، من غير حصار
- لا أنا ناوى احب، ولا غاوى احب و لا فاضى احب
- ولا لاقى سمره ترُجّنى و تخُضَنى و تصحى فيا الحبر يكتب على الورق... قلبى اتسرق
- و أنا باعترف هذه الغلامه تختلف
- يا ( --------------) ... انى احببتك فى زمن ما قبل زمان الأرواح
- ماقبل النهرِ و قبل البحر
- و قبل السٌكر و قبل الفٌجر
- و قبل الراح
- انى احببتك في زمن لا يعرف كيف تسافر في الأوردة جراح
- و شايفك بتترعشي و شفايفك بدها تقولي: (اي-كا-دوللى)، بحبك
- قد مانا مشتاقه لبلادى
- و قد الوادى من النوبه لحد البحر، بحبك
- قد يوم العيد و لبس العيد
- و رعشة جسمى وانا واقفه بشوف النحر
- و كل ليله كنت باحكي للقمر و باشهده
- واما تِشتي كنت باحكي للمطر و باعقِده
- لما ينزل فوق ازاز شباكك المقفول يقول:
- هذه القصائد تختلف
- هزي سكونى قد مللت الأن ان لا اعترف، (----------) بحبك حب صعيدي جوانى
- بحبك كيف ما سكن الليل في صوت فيروز و سكن الليل في صوت قلبي و جوانى
- بحبك حب حّيانى
- و زود شوقى للحرقه ولل لقيا و للفرقه
- وللدمعه اللى تنزل تحرق الجوابات
- و كلمه ماما مش راضيه و عندي مذاكره مش فاضيه
- و زود شوقى للمواعيد و للعربيد
- و مشتاقلك و واحشانى و محتاجلك
- بحبك
- بحبك حب كان مكسوف يبين نفسه قدامى
- و كان يطلعلي في منامى
- في صورة جوز عيون صافيه
- و بنت جمالها كله سمار و انا شايلك عروس الدار
- و ضرب النار في كف عمامي مامبطلش
- غريب الحلم لما يواعد النعسان و مايطولش
(مش كفايا)
- طياراتكم مش كفاية
- والمدافع مش كفاية
- والقنابل والحصار
- والحرايق والدمار
- والدموع فى عيون صغار
- والجناين تبقى نار
- مش كفاية
- لو عايزِنى مرة أخضع .. غيرونى
- شوفوا يمكن لو ده ينفع .. بدلونى
- ولما ما تلاقوليش طريقة
- واجهوا لو مرة الحقيقة
- واقروا من قرآنى آية
- تفهموا أصل الحكاية
- إنى بضحك عل القنابل
- موتة جاية وقلبى قابل
- تعرفوا
- إن القنابل والمدافع والشظايا
- والسلاح اللى معاكو و مش معايا
- مش كفاية
- موتونى ألف مرة
- غصب عنكم بلادى حرة
- وللنهاية كلمة بكتبها بدمايا
- للى يستشهد ورايا
- إن ثمن الجنة ديا
- لو حياتك .. مش كفاية
سري جداً إلى البحر
- و بقولّه يا بحر
- ليه الموج فى عز الهوج ما بيخلطش
- و الملح سد وِدانك و دانك لجل ما تخلصش
- يا بحر كام ألف بِت زَغزَغت رِجليها
- و رَفعت عنها الحجاب
- و لزقت فستانها بالعاني على ضهرها
- و جرحت رِجل الواد اللي جري في ضهرها
- و عملت ملحك دوا
- و اللي جراحه هوى
- مالهوش طبيب غيرك
- طب ليه بِتبخل عليا
- مع إِن نانا صبيّة
- زَغزَغت رِجليها
- و رَفعت عنها الحجاب
- و لزقت فستانها بالعاني على ضهرها
- و دبحتني في مهرها و دفعتلك راضي
- خليتلي حبي قضيّة و عملتلي قاضي
- و كويت بِملحك جرحي كِيف الدّبح
- من ميتى يا بحر الجراح بتطيب بِحبة ملح
- و أنا أَصلي و اخد عـ الـوجع
- و أمَّا الجِـراح بِتصيـب جَدع
- بيصِير وجعها بـ مِيت وجع
- تعرف يا بحر الـ ميت وجع
- وجع اللي حَبّيتها و سابِتني
- و وجع اللى بعنيها سَبِتني
- و وجع اللي عملِت مني رمل
- في قعر جوفك رسَّبتني
- و تسعميت مليون وجع للذكريات
- أصل المحبة يا بحر مش فترة و تعدّي
- دي عمر شايِل صوت هزاري و غلب جدّي
- فكر طايِح يوم يِجيب و شهور يِودِّي
- و تسعميت مليون وجع للذكريات
- عدد المحارة و الودع
- عدد الكلام مِن بين شفايِفها الجمال
- عدد الشَماسي و الكراسي و البالات
- عدد الرمال
- عدد المطر يا أبو قلب أقسى مِن الحجر
- كل اللي فاكرينك بتجمع للحبايِب شملهم
- عالم بقر
- ما أنا جبتهالك
- مش جبتهالك
- شَهِّد الشمس اللي لسه سمارها فوق ضهري تقولك
- إِنّي يا بحر ائتمنتك
- جبتهالك
- ولّا ليه شهد رِمالك
- علّي صوتك
- سمع الرمل اللي مدبوح من قساوتك و اندهه
- و إِن كان يِجاوِب اسأله فين قصور الواد داهه
- هيقولولك ما إنت يا بحر اللي هديتها
- و سويتها بِباقي الشط
- هيقولولك هو هو الموج يا بحر
- زي ما جمع حبايِب زي ما كسر قصور
- بس النوبة دي يا بحر موجك القاسي كسرني
- هو أنا ناقص كسور
- لو تعرينى يا بحر تلقى جوايا بنات مالها عدد
- ولا اتكسرتش
- زي ما تقول جسمي نحس من الحريم و بقيت وتـد
- بس النوبة دي ما انتصرتش
- بعترفلك يا هوى البحر إِني مغلوب النوبة دي
- بس خليك واعي دايمًا و افتكر مين اللي بادي
- و من الليلادي لا إِنتَ صاحبي ولا أعرِفَك
- إِياك تشوفني بِبِنت حلوة و تطلب إِني أعرفك
- صبرك عليا و هـ اكشفك
- و هــ جرِّسك
- و هـ جرِفك
- و هـ جوِفك
- و هـ كَتفك كيِف الذليل
- من الليلادي سماك يا بحر هتبقى ليل
- مِن الليلادى هـ أطفي شمسك
- و أطمس الدنيا و نهارها
- نانا ماتت
- بس فاضل لسة نارها
- و العزا عالق ما بِيني و بِينك إنت
- و الله ما هقبل عزاك
- من قبل ماخد بإيدي تارها
شيماء يا مكة
- ليل الغواني غواني
- من صُغري عايش فيه
- عذَّب فؤادي و كَوَاني
- بالله لتطّفِّـيه
- الكالكليتور و المذاكرة و صوت لطيفة
- و الفجر لما غافلني قطع هدوء الليل
- قلبي قليل الحِيل
- سايق عليكي الوجع و الغربه و المواويل
- خليت عنيكي دليل
- عشمان تخلِّيني
- لما اشتكيت حبي للصخر خَرّ ولان بالله دِلِّيني
- كيف الحجارة تلين ؟ و انتي اللي ما تليني ؟
- الشعر ده شعرك مش حانسبه لنفسي بس انتي مَلِّيني
- ياللي شخبطتي فـقصايدي
- بزياداكي شخبطه و الاسم شعر
- قسّموني قبل منك ييجي ستين الف واحده نفسي يوم يبقالي سعر
- نفسي ازفّك بين ضلوعي
- نفسي انجِّدلك مراتب
- قلبي ياما قلبي قبل منك لَمّ بَقّ
- نفسي احبك حب حَقّ
- بس خايف تبقِي نانا
- يادي نانا
- تعبان من الترحال و الغربه و المشاوير
- سايق عليكي الجمارك و البحر و المينا
- كلت سواعينا
- تكاد حين تناديك ضمائرنا
- يقضي علينا الأسى لولا تأسينا
- بالله رسينا
- بزياده غربه و شوق
- زقيني جواكي
- مانتيش كما مخلوق
- مين اللي سواكي
- مين علمك اسمك
- مين علمك اسمي
- مين علمك جوا الضلوع القاسيه تترسمي
- و مين ما يقدر يحبك لما تبتسمي
- في الرحله كان الهرم غيران
- و حجارته حسدانا
- حتى الجمال و الخيل حسدونا في غنانا
- ميل عليا الهرم و قال لي فين نانا
- قلت له مش وقته
- قال لي نسيتها قوام
- قلت مانسيتهاش
- لساها نانا في قلبي بس مش صاحيه
- نانا اللي مدفونه في قلبي جسه همدانه
- انا أصلي زيك يا هرم
- خوفو سكن جوفك و مات
- و جوفي خلته نانا جبانه
- يادي نانا
- نفسي اوضِّبلك ضلوعي فَرْش عُرْسِك
- ما اتفرشّ لواحدة قبلِك
- نامي فيّا
- مِدِّي رجليكي ازحميني
- و احلمي لي و انقشي اسمك على الغضروف حروف
- بعشقك رغم الظروف
- بعشق الليل اللي نازل فوق كتافك شعر سايح
- يا ام طيف كالسيف في جوف الصدر سارح
- بعشق الضل اللي مَرْمي فوق تراب الارض منك
- و احسد الارض اللي تحته
- قلبي كان مقفول فتحتُه
- ولِّي وجهِك شَطْر قلبي و اتلِي آيات اليمين
- و انتي داخلة قدِّمي الرِجل الشمال
- أصلِي بتشاءم من الرجل اليمين
- اصل قبلك لما خَشِّت قلبي نانا
- يا دي نانا
- يا نيل يا مبحِّر بوس لي خدودها الحُمر
- لو هاحكي عن شوقي يلزمني مليون عُمر
- رُجّ الشجر يا نيل سَمِّعها صوت شوقي
- سكَّنتها فوق البشر
- فوق القمر
- فوقي
- سكّنتها عروقي
- لما اشتكيت من بعدها زاد قُربها حروقي
- يا نيل
- يا ابو المساطيل
- دوّقتني خَمرك ما تقول لها دوقي
- فاضل كمان ساعة و الشمس هتغرِّب
- نركب سوا مركب
- الدفة فـ إديا وانتي اللي بتسوقي
- لو دوقتي خمر النيل عمرك ما حتفوقي
- يا نيل يا ابو الدراويش
- خمرك عَرَق براطيش
- عمره ما يِسْكِر حَد
- لو بوستها يا نيل و انت في عِزّ الجزر
- يِتْقَاد في جوفك مَدّ
- لو شُفتها يا نيل اباجوره بِتْلالي
- راح تنسى عِلْو السد
- بلا سد بلا عالي
- و تفيض و تلمسها
- تلعب على شطك و عنيك تغامزها
- و تعوم على دراعك صدرك يغازلها
- تطلع لي بردانه
- افرشلها رمشي
- خَطِّي عليه وامشي
- و اوعي تخافي البرد
- صدري طريق مبروك
- من يومه طارح شوك
- الليله طارح ورد
- دوسي ولا تخافي
- يا قلبي يا صافي
- محبوبتي جايه لك وسّع لها السكه
- شيماء يا مكه
- طالب احج البيت
- حاسس كأني مراهق عمري ما حبّيت
- ربِّـيني من تاني
- نفسي فـ سرير هزّاز ابكي تحايلِيني
- نفسي تضمّيني
- عرق البنات فيّا عكّر حوافيّا
- نفسي تحَمِّيني
- ارجع وليد ابيض
- انعس على صدرك
- اشكيلك الغربه تدِّيني من صبرك
- كاس الغرام دوقتُه
- صبُّولي فيه ياما
- نفسي ادوق صَبِّك
- لا تكوني مفتكرة اني فتوّه من جوّه
- ميغركيش صيتي
- حتلاقي جوّه الجوف
- واحد ماليه الخوف
- لو جيتي بصّيتي
- تبت يدا ابي
- عوّدني عـ النسوان
- و فطمني عـ الخمره
- علّمني حب الكعبة
- اكمنها سمرا
- سايق عليكي الهوا
- و الشمس و القمره
- شدّيني لهواكي
- مخنوق من الكَمْره
- خَصِيمك قلبك الليّن
- و رِقة صوتك الملكوت
- يا فاكرة العشق شيئ هيِّن
- كواني العشق كيف الموت
- منين ادخل سراديبك ؟
- منين انفض جلالبيك ؟
- و اكون لك توب
- خيطانه تداري فتنة قدّك اللولي
- و ينزل كبرياء صدرك على صدري و احلامك يصلّولي
- بحبك حب فكّرني بقساوة شمسنا قِبْلي
- بحضن امي اللي عمري ما اترميت جوّاه
- ملاقيش جوّا صدرك ركن يقبلني
- انا عيّل و صالح لسة لاستعمالك الهمجي
- بنات الدنيا ما قدروا على وهجي
- يا ريتك تقدري عليّا
- يا غنوة دافي مَسْمَعها
- انا قابل شروطك قبل ما اسمعها
- يا ريت تنسانا دنيانا
- تصير زيّانه
- زيّي انا
- يا غيرانة و معاتباني عشان نانا
- دي نانا اللي اصولها تغير
- بحبك و انتي بتردي
- و احبك يكش بتصدي
- و احبك و انتي بتغيري
- بعيرك يا منخل هام بناقتها انا ناقتها ليه بتصد بعيري
- بحبك حب مـ اللي الشعر عاجز لسة عن وصفه
- طريق قلبي بقاله شهور طريق مهجور
- عشانك حابتدي رَصفه
- تقيد نار الغرام فيّا
- انوّر و ابقى قنديلك
- و لو صعبة عليكي السكة شاوري لي و انا اجيلك
- اتوج شعرك الشلال بتاج جيلك
- و يكفاكي اكون عبدِك
- و انا يكفاني تَبْجِــيلك
عشان غني
- عشان غنى و معاه فلوس
- هملتنى و راحتله
- ابكى على نفسى ولا
- عالمسكين اللى راحتله
- و لأنى راجل مليونير و الخير كتير
- عليت عيونى عالبكا
- و قلت اسيبهاله زكا
- و دفنت ايدى فالسويتر
- و ابتديت اشوط الطوب و اغنى
- كنا نتلاقى من عشيه
- نقعد على الجسر العتيق
- كوبرى الزمالك زى ماهو
- البنات هم البنات
- و الولاد هم الولاد
- و الدرابزين الحزين لساه رزين
- و الكلاكسات اللى سارحة فالودان
- و اللى بيوشوشها فى عيونك غموض
- و اللى بيوشوشها فى عيونك امان
- بس المكان هو المكان
- خمسين سنة و الكوبرى مصلوب عالطريق
- لا انا كنت اول مين يحب
- ولا يوم هكون اخر عشيق
- و ادى البنات ألوفات مترصصين عالكوبرى
- يعنى انتى اجمل واحدة فيهم ؟
- ده انتى لو كشيتى فيهم تفزعيهم
- صدقينى
- صبغة الكدب اللى نزلت من ملامحك
- غيرت شكلك نهائى
- شوشت صورتك فقلبى بقيت ملامحك
- فاستخبيت جوه دائى
- جوه ابيات القصيدة
- باختصار المكان هو المكان
- و البنات هم البنات
- فى اللى فازوا بالنهار
- و فى اللى تاهوا فى البعاد
- و انتى واحدة من اللى تاهو
- اما انا فزى ما انا
- و كوبرى الزمالك زى ما هو
- بعيد عنك حياتى عذاب
- متبعدنيش بعيد عنك
- ماليش غير الدموع
- أم كلثوم الشقيه
- ضحكت عليا
- سهرتنى الليل بطوله
- اكتب الشعر اللى نفسك تسمعيه
- و انا لاجل خاطرك مش هاقوله
- و ان كان حبيبك شاعر كتّبيه
- و ابعتيلى قصايده اول باول
- اه يا زمن يا احول
- بقى ابقى حبيتك و بقيتك
- عن الدنيا و ما فيها و اصطفيتك
- سبتلك وردة فؤادى تقطفيها
- كنت فاكرك هتراعيها
- و تداريها بين ضلوعك
- و ان ما كفتهاش دموعك
- من دماكى تضيّفيها
- كنت فاكرك يوم ما اقول الآه
- هاتخدى منى الآهة تخففيها
- ولا كنت يوم يخطر عليا
- انى لو مديت اديا
- ليكى ممكن تكسفيها
- يا ام كلثوم الغرام محتاج حموم
- قبل متغنى لقلوب الناس تعالى نضفيها
قصيدة رثاء طفلته جويرية
- يا حتة القلب اللي مات
- وعد يا ست البنات
- هفضل أحبك من سكات
- و اشرب سجاير برى أوضتك من سكات
- و ألبس هدومي و انتي نايمه
- و اقفل الباب من سكات
- و أفضل أعلم كل شهرين
- جوى كشف التطعيمات
- وعد يا ست البنات
- لأفضل أحوشلك جهازك
- و أشتريك طقم صيني
- و أبقى حالق دقني دايماُ
- و انتي بس اللي تبوسيني
- أوعي ماما تعرف إننا جبنا شيبسي
- فكريني و احنا نازلين أبقى أجيبلك بُكره بيبسي
- ما تتشاقيش في المدرسه
- و ما تلعبيش وسط الولاد
- و فكريني أبعت معاكي صوره لشهادة الميلاد
- ياه عـ الوجع
- لما بتصغر من مراراته أي آه
- ولا يصحكش من حلماك
- إلا على شهادة الوفاه
قصيدة سكرانة
- من كام شهر
- خدت قرار مش هاكتب شعر
- و إني هذاكر و انجح و أفلح
- و اخد البكاليريوس و أتجوز
- و أشتري عفشتي بالتقسيط
- من كام شهر أنا كنت عبيط
- من كام شهر
- زرعت الميه و طرحت فجلة
- جاب العجل الفجلة العجلة
- و قالها مهرك
- ريحة قهرك
- فايحة في نهرك
- قالت إوعى تعيش كسلان
- بابا نويل بيوزع يويو في حرب إيران
- شامم ريحة جبنة قديمة
- فيلم السهرة مكنش سياسي
- كان عباسي
- عبدالناصر حب يقلد فينا الروس
- ساوى الروس
- لبرل نفسك
- لأجل ما تبقى مثقف زي صاحبنا إياه
- عندك ماركس عندك هيجل
- عندك حسن البنا و حجي
- عندك زحمة
- صفي و نقي
- منحنى عرض النسكافيه و اخد إفيه
- حاصل ضرب النكسة في حرب أكتوبر في معاهدة ديفد
- بيساوي حاصل ضرب النار في التار في العار
- مرفوعه لأس اتنين مخاويت
- و زي إمرؤ القيس و جلامدة اللي بتنزل من عل
- عندينا واد اسمه علي بيطلع الدبابة و يلف بيها في البلد
- و مراته دايرة بشعرها تدور عليه
- و متسألوش أنا قصدي إيه
- أنا نفسي مش فاهم كلامي
- بس الكلام واعر حويط
- أنا اللي دون الناس عبيط
- من كام شهر كنت بحبك
- كنت بوضب روحي و احبك لأجل ما أقابلك
- كنت في كل حلاتك قابلك
- تفرحي قابلك
- تزعلي قابلك
- تتقلي قابلك
- كنتي الأرض و كنت سنابلك
- كنتي الحرب و كنت قنابلك
- حتي في بعدك و إنتي مسافرة
- و بيني و بينك ألف محطة كنت بقابلك
- عمري يا "نانا" ما قلبي اتنازل
- ولا ساب حقة زي ما سابلك
- عمره ما ضحى بسهده و سهره
- و جاب من عمره زي ما جابلك
- هذا الوَجَعُ بَقَاياكِي
- سِحْرٌ تمدَّدَ بَيْنَ ضِلْعَيَّ
- و تَوَارَي خَلْفَ ُسلَّمِ مَنْزِلِكِ
- تَرَكَ لَكِي رِسَالَةَ كُلِّ صَبَاحٍ و سَافَرْ
- يشهد عليكي السلم المستني خطوتنا
- يشهد عليكي الشبابيك اللي فتحتيها علشاني في نص الليل
- و عز البرد يشهد عليكي محل الهدايا اللي عـ الناصية
- و كشك الورد
- تشهد عليكي هدومك اللي قولتلك ما تلبسيهاش
- تشهد عليكي إمتحاناتي اللي علشانك مدخلتهاش
- تشهد عليكي ودني هوستن جورج مايكل
- عم شوقي بتاع الفطير كيف يصير الحال كده
- مـ الإبتدا أنا اللي غلطانلك
- و أنا اللي محقوقلك
- و أنا اللي دون الناس عشقتك
- كنت عايش جوه صدرك حلم دافي
- كنت بنسى الناس و أجيلك يوم معادك ياكش حافي
- كنت أبسط من بسيط
- و اكتشفت إني فـ هواكي
- كنت دون الناس عبيط
متزعليش
- لو جم قالولك إنُّه مش باين عليه أثر الفراق
- و انُّه مش بيجيب فى سيرتك و انُّه عادى
- لا بان عليه أثر الفراق ولا فيه ألم ولا فيه اشتياق
- حقاش قصيده كتبها فيكى
- هى دى اللى طلعتى بيها
- أما هو خلاص نسيكى
- عادته ولا هيشتريها
- و احنا قولنالك زمان ما بتسمعيش
- فا ماتزعليش
- ثم هو ماكانش نقوه
- كان بيتأخر عليكى بالساعات
- و كان مفلس و شاكله يعنى ماكانش هو
- كل أصحابك عابوه
- أهو غار فى داهيه
- و بكره يركع تحت رجلك سيد أبوه
- بس يمكن كان حنين حبتين
- حبتين هم بس حبتين
- كان برضه بيسخّف عليكى
- كنتى فين و رايحه فين
- بس كان بيبان عليه
- لما اسمك ييجى فى الكلام تلمع عنيه
- بس برضه كان سقيل
- ما كانش بيقدر ظروفك
- كام مره قلتي مستحيل
- و يصر برضه انه يشوفك
- و ما تزعليش من قساوة الدنيا و عنادها العجيب
- أنا كنت فاكر نفسى أقوى من النصيب
- و كنت بتّريق على اللى ما كملوش
- مين كان يقول ان النهايه تكون فاشوش
- أنا لسه فاكر و قفتك و سط البنات
- فاكر هدومك و ابتسامتك و الكلام حتى السكات
- اذا كان فراقنا صحى فيكى كام وجع
- أنا كل ليله بتدبح بالذكريات
- أنا عندى ركن بحط فيه كل الحاجات
- كل القصايد و الألم كل البنات
- جيت أركنك جواه رفض ماكفاكيش
- فا ماتزعليش
- أنا بس طبعى قعود و بكتم جوه منى
- مش فاكره نانا و جرحها
- طب بان عليا بعدها
- مش كنت بتنطط و اغنى
- و الناس تشوفنى تقول حجر
- ولا اتوجع ولا اتكسر
- زى الجبل ما بينحنيش
- ماتصدقيش
- أنا لما سيبتك كل حاجه اتغيرت
- ريحة الشوارع و الدكاكين القديمه و البيوت
- كأنى ببدأ من جديد رحلة حياتى أو بموت
- حسيت كأنى نهيت حياتى خنقتها
- أنا كنت متخانق معاكى وقتها
- ماكنتش أقصد أقولك امشى ما ترجعيش
- بس انتى كنتى صغيره مافهمتنيش
- الطبع غلاب و انتى عارفه و كنتى لازم تعذرينى
- ماعرفتش اترجاكى و انتى بتدبحينى
- ربونا عالهيبه و عالحب بقيامه
- و ان لما البنت تتقل يوم عليك بالسلامه
- صدقيهم لو قالولك إنى عصبى أو فلاتى
- و انى بعرف ألف واحده و قلبى بيغير يوماتى
- صدقيهم لو قالولك أى كدبه عن حياتى
- بس أوعى تصدقيهم لو قالولك انه كان كداب معاكى ما حبكيش
- و ان جم قالولك انه مش باين عليه أثر الفراق ماتصدقيش
مش طبيعي
- لما يغرق مركبي و انا سايقه فجأة
- و لما تنهي قصتي و انا لسة بادئة
- لما تنكر تضحياتي
- و لما اوهب لك حياتي
- و ازرع الدنيا فـ عيونك ورد يطرح من ربيعي
- و التقاك بتقول لي ضيعي
- مش طبيعي
- فين كلامك عن حياتنا
- فين سعادتك و انت بتلاعب ولادنا
- و عنيك تغير كل ألوان الحاجات
- طلقتني و نسيت معايا الذكريات
- انا لسه فاكراك و انت بتقول لي احلمي
- و انا لسة فاكراك و انت بتقول لي ارسمي
- بس مش حاقبل اكون برواز خشب عـ الحيطة يقدم يترمي
- كان الطبيعي و انت بتقول لي احلمي
- و انت بتقول لي ارسمي
- تقول لي بيعي
- مش طبيعي
مكملين
- مكملين و للى مش فاهمين نقول
- للى مش فاهميـن نزولنا
- للى معاشوش ظلمنا
- ولا قهرنا ولا حسوش نزولنا
- للى مداقوش مر جوعنا
- للى ماناموش فى الشوارع كالدبايح
- كملوا بالليل عشاهم من الصفايح
- للى مش فاهمين مهانة الرجال
- قهر الرجال
- للى بيقولوا علينا حبة عيال
- احنا مش حبة عيال
- احنا شوفنا النيل بينشف في البيوت
- و اما يجري يتفرش حمام سباحة فى قصر باشا
- مستكترين فيا الغضب مانا كنت غرقان فـى البشاشه
- كنت راضى ببوق ميه و اقول دى هانت
- كنت ببكى فى القصايد
- كنت بشتم فى القصايد
- تتقطع ايدى اما قولت حبيبتى ماتت
- للي مش فاهمين نزولنا فى الشوارع
- احنا بندور على الحلم اللي ضايع
- احنا جرينا النفس فى عروق عيالنا
- يكبروا فاهمين حاجات مافهمنهاش
- اقبل اني اعيش عشان حلم و قضيه
- بس ماقبلشي اني عمرى يضيع بلاش
- مااحنا سيبنلكوا البلد مانصفتــوهاش
- ماتلوموش على اللي اتعجن فى المعجنه
- و اللي اتظلم
- و اذا كنتوا فاكرينا غنمـ
- على حظكم أنا جِدْي فاق
- فاكرين زمان حذرتكم
- مستني ايـه من طفل رَبُّوه بالزعاق
- إذَا كنتوا فاكرينا غنم على رزقكم
- أنا جِدْي فاق أرزاق
- للي مش فهمين نزولنا فى الشوارع
- الحكومه عودتنا على الشـوارع
- بيتتنا فى الشوارع نيمتنا فى الشوارع
- الحكومه قفلت على نفسها كل البيبان خوفتنا من البيبان
- فاترمينا كلنا فى حضن الشوارع اكتر مكان لقيناه أمان
- للي خايفين على البلد لحسن تموت
- ماتخافوش الموت سكوت
- و احنا مش فى الخــــطه اصلا ان بكرة يكون سكوت
- احنا شايلين حملنا و مكملين
- بكرة بيشاور علينا و احنا مش مستعجلين
- مااحنا لينا كام سنه متقندلين
- صابحين في طين نايمين فى طين
- احنا بنأسس بلد تسمع شكاوي المظلومين
- نشتغل نلقى عرقنا قصاد عنينا
- مش في جيب النصابين
- نشتكي نلقى اللي يسمع شكوة الناس الغلابه الطيبين
- احنا بنشكل بلد
- لاهي خايفه من صوت الاذان
- ولا خايفه من ان الكنائس تتبني
- إحنا بنشكل وطن عافيان غني
- مش وطن يخدم 15 نفر و يبات جعان
- احنا مش عاوزين وطن مزلول مُهان
- المصري مش لايقه عليه كلمة مُهان
- يقولك إحنا عملنا فوضى
- احنا بردوا عملنا فوضى !
- إحنا كُنا بنتجلد و نعيش و نرضى
- و احنا كنا بنتسرق و نعيش ونرضى
- كانت الأسعار بتغلى
- و كنت بـرضى
- و الشرطة بتفتشني عادى فى أى وقت
- فى أي حته و بدون مناسبـه
- و كنت برضـــــى
- و الانتخاب من سن كام لسن كام
- “معرفشي ليه” و كنت برضى
- جاي النهارده تقولي احنا عملنا فوضى
- طب فوضى فوضى
- ماسورة الغاز بتقفلها لصعيـــد بلدك
- و لتل أبيب بتفتحها
- ماسورة الغاز بتقفلها على ولادك
- و للاعداء بتفتحها
- و ناس شقيانه طول اليوم عشان لقمه
- و غالي ياخدها على الجاهز
- إللهي يارب يطفحها
- و ناس تسكن قصور بتدور
- و ناس الجوع بيدبحها
- و ناس بتموت فى الميادين فدى الثوره
- و ناس خايفة على مشاعره لنـجرحها
- ياخي [ أحىَ ]
- إحنا هانكمل و هانزُق البيبـــــــــان
- يارب انت المستعان
- و اللي بيقولوا علينا مغيبين
- و مسطحين و مجوفين
- و بوابين ومعفنين و منتنين
- و بلطجيه ومأجورين
- خليهم يقولوا براحتهم
- احنا بردوا مؤدبين
- و مسالمين
- بس احنا بردوا “مكملين”
تعليقات
إرسال تعليق