اقوال وحكم صلاح جاهين
“يا طير يا طاير فـِـ السما .. يا بختك لا فارق معاك حاجة وعايش براحتك لــو عــرفــت إيــــه اللـــي فـيـنـــا عــمــــرك مــــا هـتـبـــص تـحـتـــك وعجبي !!”
“على اسم مصر التاريخ يقدر يقول ما شاء أنا مصر عندي أحب وأجمل الأشياء بحبها وهي مالكة الأرض شرق وغرب وبحبها وهي مرمية جريحة حرب بحبها بعنف وبرقة وعلى استحياء واكرهها وألعن أبوها بعشق زي الداء واسيبها واطفش في درب وتبقى هي ف درب وتلتفت تلاقيني جنبها في الكرب والنبض ينفض عروقي بألف نغمة وضرب”
“يوم قلت آه...سمعونى قالوا فسد ده كان جدع قلبه حديد و اتحسد رديت على الملايين انا و قلت لو تعرفوا معنى زئير الاسد عجبي”
“قتلوه من التعذيب وقالوا انتحر.. فكرت لحظة وقلت: آه يا غجر!.. لو جنسكم سبناه يعيش في الحياة.. اللي انتحر راح يبقى جنس البشر!”
“ولدي نصحتك لما صوتي اتنبح.. ما تخافش من جني ولا من شبح .. وان هب فيك عفريت قتيل اساله .. ما دافعش ليه عن نفسه يوم ما اندبح .. وعجبي”
“دخل الشتا وقفل البيبان ع البـــيوت وجعل شعاع الشمس خيط عنكبوت وحاجات كتير بتموت في ليل الشــتا لكن حاجات أكتر بترفض تمــــــوت عجبي !!”
“أنا مش تبع مخلوق يا سيدنا البيه أنا حُر في إللي يقول ضميري عليه وإن كنت تُحكم جوا ملكوتك الشارع الواسع فاتح لي إيديه”
“إنسان .. أيا انسان ما أجهلك ما أتفهك فى الكون وما أضألك شمس وقمر وسدوم وملايين نجوم وفاكرها يا موهوم مخلوقة لك؟ عجبى”
“ مرغم عليك يا صبح . .مغصوب يا ليل. لا دخلتها برجليا ولا كان لي ميل. شايليني شيل دخلت أنا في الحياة. وبكرة هاخرج منها شايليني شيل”
“عجبتني كلمة من كلام الورق النور شرق من بين حروفها و برق حبيت أشيلها ف قلبي .. قالت حرام ده أنا كل قلب دخلت فيه اتحرق !!!عجبي ”
“أعرف عيون هي الجمال والحسن وأعرف عيون تاخد القلوب بالحضن وعيون مخيفة وقاسية، وعيون كتير وبنحس فيهم كلهم بالحزن عجبي”
“أنا قلبي كان شخشيخة أصبح جَرس جلجلت به صحيوا الخدم والحرس أنا المهرج .. قمتو ليه خفتو ليه لا فْ إيدي سيف ولا تحت مني فرس عجبي !!”
“غمض عينيك و ارقص بخفة و دلع الدنيا هي الشابة و انت الــــــــجدع تشوف رشاقة خطوتك تعبــــــــدك لكن انت لو بصيت لرجليك ....تـقع عجبي !!”
“نوح راح لحاله و الطوفان استمر مركبنا تايهه لسه مش لاقيه بر آه م الطوفان وآهين يا بر الأمان إزاي تبان و الدنيا غرقانه شر عجبي !!”
“في يوم صحيت شاعر براحة و صفا الهم زال و الحزن راح و اختفي ... خدني العجب و سألت روحي سؤال .. أنا مت ؟و لا وصلت للفلسفة عجبي”
تعليقات
إرسال تعليق