اعلان

شعر لبناني بالعامية

 شعر لبناني بالعامية

قلبي

قلبي متل خيمة عرس

فل الفرح منها وأخد الطرب

قلبي متل وادي نِعِس

ع كتر ما بيعدوا عنو العرَب..

قلبي متل قلعة تركوها الحرس

حجارة عم تفتش على موال

بقيت تخيّل حَوْلها الفرَس

ويا همّ الفرس.. إن صارت بلا خيّال.

متل شقفة قمر مكسور

وقعت من كفّ السما

صارت صبي مقهور

غنية غجر.. الدني ما بتفهما

متل مكتوب العشق لما انفتح

هرهر قوافي ووتر

رشرش خمر والورقة القدح

سكرت عيون الليل.. وما نعس السهر

متل وردة ع تاج المملكة

اشتاقت ع شي بستان

رميت قناني الدهب تتلاقي البكي

يمكن دموعا تدلها على نيسان..

متل الي ماشي بعد المعركة

يدوّر على مفتاح

لمح عالأرض إيدين ملبّكة

أتاري انقتل، وما عرف يرتاح.

متل شتوة بنص الصيف

طلّت على بيروت

مرّت ع بحرا متل شي سيف

ضب البحر حزنه.. وبلع البيوت.

قلبي عريشة عنب تعبت

من ضرب الشمس ع خد عنقودها

قلبي متل جدولة بنت بكيت

لما إجا الموت، يسرقلها جدودها

متل درويش داخ بشعر حلاج

وما في إله اقتنع

متل شفة غطّت ع وج محتاج

وما خف الوجع

قلبي النعس والسِكر بليالي التعب

قلبي صورة الموتى، بنشرة غضَب

قلبي قصايد حب محبوسة بعلَب

قلبي متل بغداد عم تبكي حلب

قلبي.. 

متل قلبي، شو نفع الصور؟


عم بكتب وجّك
وجك وج الأرض
حامل زوادة واسمك
عم ياكل زندي التعبانة..
وجك أرض وشِعري حجار
نعسانة..
عم تغفى فوقك:
خطيي.. خبيها بفيّك
غيمة طلّت متل جناح
نسر ورعد وبرق ووجك
خلي الغيمة
تزرع ماي
وخلي عيونك أنتِ وشاح
للي ما عندن خيمة
للي ما عندن قلبك..
ان كان بدك ارقص برقص
رقصة ديب
شاف الغنمة
حلوة وحراسا قلال
سكر عينو فتح شفاف
والناب مصفّى خلخال
صوّب بارود الموّال
وقلها بحبك
وان كنّك ثورة كوني
شمعة عم تحرق عتمة
توزع عالفقرا مونة
ضو وفرح وحب كتير
تعلّق عجبين الحقلة
غنية وفيها غلّة
ونجمة
كوني نجمة بصدر العتمة
وخليني الليلة حبّك.
بجبلّك من عرق التبغ
قْوافي بشبكها بخصرك
والزيتون يصير جرار
عم تدبك حَوَلا صدرك
برد وعود وسهرة نار
رصاص موصّل ع خدك
وقواص مبلّش تمّي..
بيطلعلي الليلة بوسك؟
بيطلعلي الليلة بوسك!


مقالات ذات صلة

تعليقات